वाकीपाडा येथे महिलांच्या नेतृत्वाखाली लोकसहभागातून तीन माती-गोणीचे बंधारे बांधकाम पूर्ण…

दिवशी (ता. डहाणू) — ग्रुप ग्रामपंचायत दिवशी हद्दीतील मौजे दिवशी, वाकीपाडा येथे आज दि. 31 डिसेंबर 2025, बुधवार रोजी ग्रामपंचायत दिवशी पैकी प्रगती महिला बचत गट- वाकीपाडा येथील महिलांच्या वतीने ग्रामपंचायतीअंतर्गत बंधारा बांधण्याचे काम यशस्वीरीत्या पार पडले. सदर काम वाकीपाडा येथील प्रगती महिला बचत गटाच्या नेतृत्वाखाली तसेच पाड्यातील सहकाऱ्यांच्या सक्रिय लोकसहभागातून करण्यात आले.

ग्रुप ग्रामपंचायत दिवशी अंतर्गत विविध विकासकामे हाती घेण्यात येतात. त्याच अनुषंगाने दिवशी पैकी वाकीपाडा वस्तीच्या बाजूला असलेल्या साखळतोडी नदीवर तीन बंधाऱ्यांचे बांधकाम करण्यात आले. हे सर्व काम नियोजित वेळेत आणि यशस्वीरीत्या पूर्ण झाले आहे.

हा लोकउपयोगी प्रकल्प “पाणी अडवा – पाणी जिरवा” या उद्दिष्टाच्या पूर्ततेसाठी अत्यंत महत्त्वाचा ठरणार असून, त्यामुळे पाणी साठवण क्षमता वाढून शेतीसाठी तसेच गुरे-जनावरांसाठी पाणी उपलब्ध होण्यास मदत होणार आहे. या उपक्रमात स्थानिक महिला ग्रामस्थांचा उत्स्फूर्त व सक्रिय सहभाग विशेष उल्लेखनीय ठरला.

या विकासकामात माननीय सरपंच साहेब, उपसरपंच साहेब, ग्रामसेवक साहेब तसेच ग्रामपंचायत सदस्यांची मोलाची भूमिका लाभली. ग्रामपंचायतीच्या मार्गदर्शनाखाली स्थानिक नागरिकांचा सहभाग घेतल्याने बंधाऱ्यासारखी कामे जलद गतीने पूर्ण होऊ शकतात, असे यावेळी नमूद करण्यात आले.

हा उपक्रम परिसरातील पाण्याची टंचाई कमी करण्यास उपयुक्त ठरेल, असा विश्वास ग्रामस्थांनी व्यक्त केला. तसेच भविष्यातही प्रगती महिला बचत गट वाकीपाडा यांचे ग्रामपंचायतीच्या विविध विकासकामांमध्ये नेहमीच सक्रीय सहकार्य राहील, असे मत यावेळी व्यक्त करण्यात आले.